CV de Kwaakers Lin

Woo de coronacrisis biej menigein veural neersjlachtigheid en weemood tewaeg bringk, haet 't biej CV de Kwaakers louter veur eine waore boost van creativiteit gezörg. Al jaore hejje v'r eine druim: 't make van ein eige leedje. Covers höbbe v'r zat. Die zeen auch zo gemaak. Orkèsbendje rippe, tèkske penne en hup, de höbs ein nummerke. Toch bleef det verlange knage: ein eige creatie, get woobiej se neet zomèr de kuns biej eemes angers höbs aafgekeke, det waas ós ultieme doel. Want laote v'r eerlik zeen: es zelfs ein leedje mit de teks 'Fliep Flap Flibidibi Flap' ein hit kint waere, den kinne veer auch eine knaller sjrieve. Althans, det hadde v'r gedach. Nao oere achter 't mengpaneel en inne sjtudio te höbbe doorgebrach, ligk hiej 't veurluipig ieërste resultaat. Speciaal om de kaoje coronaimpasse te euverbrögge, höbbe v'r veur uch ein tactvol feesnömmerke gemaak. Mit toeters, trompette en ein verfrissend beteikenisloze tèks. Zo verdrieve v'r de rompsjlomp van alledaag en beeje v'r sjandalig dansbare input veur edere geoorloofde quarantainerave. Of 't ech good is weite v'r zelf eigelik auch neet. Mer v'r höbbe 't gaer gemaak. Mit väöl leefde en ein bietje beer.