NEBRA

NEBRA é un proxecto musical inspirado na estructura das cantigas tradicionais das cantareiras, con sons de electrónica, baixo eléctrico e percusión máis afastada do concepto tradicional. O proxecto nace en abril do 2020 en Lugo da man da cantante e mestra de canto Sara Pérez Cruz (Sara Nebra), en colaboración co baixista Ángel Boquete. Posteriormente únese o batería Ro Muñoz ó proxecto.

Durante a etapa do confinamento, NEBRA sacou o seu primeiro tema co arranxo de Daniel Díaz Rodríguez, recoñecido compositor ribadense gañador de 3 premios Jerry Goldsmith Awards.

NEBRA participou no Proxecto Lorca, promovido pola área de Cultura da Deputación, en colaboración coa USC, con motivo da celebración do centenario das viaxes do poeta e dramaturgo por Galicia. NEBRA musicaliza Danza da lúa en Santiago, un dos seis poemas galegos e gravan o tema nos Estudios Abrigueiro.

Sereas é o primeiro álbum de NEBRA, gravado no clube Clavicémbalo e masterizado por Iván Reija. A banda decidiu gravar o álbum coma un falso directo, nunha toma, para conseguir un son máis propio dun concerto. A presencia dunha voz de estilo folk ou tradicional fusiónase con sons de sintetizador propios dos anos 80, un baixo eléctrico con efectos achegados ao metal e sons de batería e pads propios da música contemporánea, o lo-fi e o rock. A temática das letras é variada, dende unha crítica ós incendios en Galicia ata a visibilidade do feminismo e da saúde mental.