Ruedi Bieri

Ich bi der Ruedi Bieri, bi z’Äntlibuech ufem Burehof Schluchen vor…….em…mängem Jahr uf d’Wäut cho und bi det mit mine vier Gschwüsterte glücklech ufgwachse. Scho aus Bueb hani gärn Musig gmacht und bi de ou scho gli i Musigunderricht gange und ha glehrt Trumpetä spielä. Der liebscht hani aber damaus immer scho gärn im Stägreif gschpöut und eigeni Melodie erfundä.

​Bis 28gi hani de i der Musiggsöuschaft Äntlibuech trumpetlät, aber scho mit 25gi bini Mitgründer vom Joduklub Fischterwaud gsi. Mit miner Frou Lisbeth hani scho aus 20jährige im Usgang und öpe be üsne Chuchifäschtli’s gsunge, mängisch bis früe i Morge. Das het üs für üses ganze Läbe zäme gschweiset. Üsi zwe Töchtere hei üsi Liedeschaft natürli ou mitübercho und hei ou sehr äs fins Musigghör i d’Wiegä gleit übercho.

​35 Jahr beni Vorjodler und 8 Jahr dervo Dirigänt im Joduklub Fischterwaud gsie. Näbe mier het ou d’Lisbeth 20 Jahr vorgjodlet. Jetzt töi mer üs vorauem üser Verwandschafts-Gruppe BieriFroue plus widme. Mier hei scho vöu schöni Uftritt gha mitenand und hei ou einegi schöni Projekt vor üs.

Öpedie göi mer ou im Duett und Terzett zäme mit em Ruedi Ränggli ga ufträtte.

​Ganz ä hufe Uftritt ha ni mit em Joduquartett Schimbrigjodler gha. Mier hei vöu überlifereti Liedli und ou Lumpeliedli gsunge, derzue ou Kompositione vo mier.

Nach de Schimbrigjodler hani ou mit em Doppuduett Fischterwaud, mit de Sonja und em Jules Ränggli und de Lisbeth, Uftritt um die ganzi Schwiiz gha.